WANGALA

 Mi misiko chaatgipa miteko Misi Saljong ine minga. Ukon Teng'sugipa Teng'togipa Kangra Balsa ineba minga, Mi misi akmano aro a'bani pilak biterangko man'mano Misi Saljongna dingtangmancha on'pilskana manianikon 

A'chikrang Wangala ine minga. Uan bilsini gisepo dal'batgipa maniani ong'a. la manianiko A'beng aro Matabeng jolo manirongbata, Gipin jol rangode wangalrongja: indiba Misi Saljongna kritanirangkode dakronga. Una do'bipa mangsako doke, an'chiko sambasiao satkikie, chuko on'tisa a'ao, sambasiani mikkango rusrote bilsio dingtangmancha krita.

Bilsi bon'angachibara October jao Wangalaniko manironga. Ua manianiko apsan salo dakrongaia, Songprakni nokmarang an'tangtangni namnika salko manchie, mitamara sima nie stite salko tik ka'a. Ua somoirangon manderang chatchiskako grongna re'grika aro kusi ong'e soka chakgrika.

Rongchu gala aro Ahala:

Mi misi minmano uarangko cha'nagita Pattigipa Ra'rongipa Misi Saljongna dingtangmancha on chengna nanga. Misi Saljongna on'chenggija cha'ode ua namnikja aro patti ra'ronja ine A'chikrang beberara. Indake dakjaode Asiko aro Maljako gita sinanggija siata ba Asimalja ine agantoka.

Uko dakna nokma an'tangan rongchu su'ate, pringwalni chakate chiringchina re'ange rongchuko chio gobrake donea. Unoni re'bapile cha'chat so'e mania. Ukon Rongchu gala ine minga.

A'chikrang mi misi chabamitingo, biterang stubamitingo ramram a'bokja ba'ohoho ine chrikna on'ja. A'bokramramode mi misi birong dakja aro a'baoni biterang silja ine bebera'a. Mi misi minmanosa uarangko ake mitena chine on'ani ja mano kimindamko pike midongko ra'bae ahaianiko daka.

Wangalna skang uamang mi misiko salo rame su'e cha'ja; indiba rangkareo jo'esa su'e cha'na man'a. Biterangko, mongsongde akkaru kobok, chambil, chinare, te'mit indakgiparangko ake cha'na man'ja. Iarang pilakkon wangalani somoio mitena chinchengesa ja mano cha na man'a aro e'salkoba chitgija jakgimik jakkala; wangalani somoionisa chite jakkalna on'a.

Wangalna skang uamang ringe cha'e an'sengna gita, churangko dikkani dikka song'e mi misirangko su'e chimonge donsotoka. Matchurangkoba dongkal cha'kalgipa manderangde agrango gate uarangko den'e cha'na donsoa. Ua salrango ganna chinna gita antioni ba'rarang, rikgitok, natapsi, kakam, kotip ba uandakgiparangko bree donsoe kusi ong'e nichaksoa. Do'merangko man'a dipet chimonge do'kua ki'meko kochape. mitamara pilnerangko nitobee tarie donsoa.

Mese Cha'na mese jeta:

Songo donggipa panterang, wangalna skang jamo donggipa meserangko noksam nokgilo bitgipa a'kolrangko cho'e am'e, so'e cha'en        an'sengsochenga. Uni miksongade, man'gimin biterangko, mi misirangko nisigiparangko gimaatchengani ong'a

Rongdikna aro nokna krita :

Mese cha ani ja'mano nokma, noko dongipa rongdikna do'bimako rasote uni jik dedrang baksa kritna nanga. Rongdiko kilko kachape.  an'chiko satkikie Rokimena minge do'kimilrangko rongdiko potchape nokma an'tangan krita. Uni ja'mano do'bipako rasote, uni an'chiko satkikie pakmarango toke, nokni maljurina krittaia. Indake damana bangsina aro gipin gipin jakkalanirangnaba uamang krita.

Rugalani Sal:

Rugalna skang songni nokma pringo ang'ke jikna re'angchenga. Unoni sokbapile mitena chine on'na gita pilakkon tarie dona. songgimikni manderang wak matcha dene, be'en bitinrangko tarie suale ra'rone dontoka. Attamchibara nokma mitena minge mitongbol kae, ta'a, e'ching, akkaru kobok, chinara aro gipin gipin biterangko ra'bae dona. 

A'bao jakkalgipa atte gitchirangkoba ra:bae Pattigipa Ra'rongipana chu jakrako rusrote, merongko jakkongsa ra'bae puripripa. Indake  e'salko chite ane, ang'ke mangsako chine manggipinko chu rudape wata.  Songni manderang pilakan nokmani nokona re'bae rangrangko damarangko dokna'a bachengtoka. Uarang baksa kramrangkoba doka. Nokrango aro jakkalani bosturango wantiko ra'e toka. Chukoba dikkaoniko cheke pante me'tra ringe cha'e an'sengtoka aro unona re'bagipa sakantian kusi ong'e cha'na ringna on'a.

Cha'chat so a:

Cha'chat so'ani saloba, nokma pilakna skang mitena minge Misini Ta'kapana, Saljongni Ta'kapana, inidin rikongo, ini pakma nagongo toke on'onga, chine on'onga ine minge, chu jakrako pilakchin on'tiprak rusrota. Mi cha'ani somoi ong'ahaon miko pilakan cha'toka. Cha'mantokahaon, nokmani noko mi song giminko gobraktoka. Cha'chatko so kujana kingking nokmani noko pilakan chu ringe sengsotoka aro me'asarang saksani ja'mano saksa dake mil'am seppi ra'e grikna a'bachenga. Somoi ong'ahaon nokma an'tangan grikchote, cha'chat so'chakaniko ra'e nokni maljuri sambao so'na a'bachenga aro cha'chat so'gipako jinma dongduule damarangko, rang kramrangko ta'rakbate doka. So'ani wal'ku nokni bolgro dingding balongkatode bilsi nama aro mi misi man'a ine agana. Gipinchi gitchinge wal'kuangskaode, chang'gipino mi misi namja aro bilsi namja ine bebera ani gnang. Cha'chat so'ani ja mano, nokoni ong kate mil'am seppi ra'e, dama bangsi sike, jakpa riprap ripap, dama ma'rap, ja a ja'susete, ki sang nongneng nongneng, kotip kadoreke, do'me mejek pote, me apa me'chikma, pante me'tra apsam apsan kusi ong'e chroktoka.

Nokmani sa raona ong'katahaon, uamang dingtang dingtang dake chroke an'sengronga. Uamang chrokani kri damakoba doka, bangsikoba sika. Chrokmitingo, basakoba me'a me'chik jora, me'asarang dama kee, me'chikrang uamang ni jakasichi donge jakko de'e chroka. Me'chikraraba apsan apsan chroka aro me'asarang uamangko jangchi done dama doktime bangsi siktime on'a. Uandake a'tilaona ong'kate ma'rap ma'rap ring'anirangko ring'e chrokmesara. Chrokmitingo uamang an'tangtangni changa sapa gita dingtang dingtang dake chrokmesaanirangko daka.

Chrokanirang:

Chrokanirangko chanode ming sotbongana bate donga. Uarangoni mitamrang. grika, sa'ra roa, ajeme roa, gaewang roa, megaru den'a megaru jika, ambare rurua, kotip den'a, do'kru sua, chambil moa, ba'ra su'a, mi su'a aro jik seka. la chrokani mingprakan uamang ni maiba mikosngani gnang ine nikna man'a

Uamang nokmani sa rao chrokman'o, noksaoni noksaona re'roroe chrokroroanga. Songo nokma sakgni dongode sakantini nokon cha'chatko so'na nanga. Uamang songo chu bon'kujana kingking ringe cha'e chroka. Basakoba basakoba antigni batpile dontonggija chroka. Chu bon ahaosa uamang dontonga.

Kram gogata :

Wangala matchotahaon songni manderang dama doke adil sike, nokmani noko rang kramrangko donepil'toka. Unoba nokma cha.chat so mike chu rugala. Pattigipa Ra'rongipako mittel mitchue wangalaniko dontonga. Ia bon.chotgipa dakanikon Kram gogata ba jol wata ine minga.